ഒരു മാസത്തിനിടെ പലതവണ മിസൈൽ പരീക്ഷണങ്ങൾ നടത്തുന്ന ഉത്തരകൊറിയയുടെ പുതിയ പരീക്ഷണവും വിജയം. അതിർത്തിയിലെ വിവിധ മേഖലകളിലൂടെ ഓടുന്ന തീവണ്ടികളിൽ നിന്നും തൊടുക്കാവുന്ന മിസൈലു കളാണ് പുതുതായി പരീക്ഷിച്ചത്. കിം ജോംഗ് ഉൻ നേരിട്ട് പരീക്ഷണം വീക്ഷിക്കാനെത്തിയതായും റിപ്പോർട്ടുണ്ട്.
ഹൈപ്പർസോണിക് മിസൈലുകളടക്കം ഈ മാസം മൂന്ന് മിസൈലുകളാണ് ഉത്തരകൊറിയ പരീക്ഷിച്ചത്. അമേരിക്കയടക്കമുള്ള ലോകരാജ്യങ്ങൾ മുന്നറിയിപ്പു നൽകിയിട്ടും കൊറിയ പരീക്ഷണം തുടരുകയാണ്. തീവണ്ടിയിൽ പരീക്ഷിച്ചത് ഹ്രസ്വദൂര ബാലിസ്റ്റിക് മിസൈലുകളാണെന്ന് ദക്ഷിണ കൊറിയ അറിയിച്ചു. ദക്ഷിണകൊറിയയെ ലക്ഷ്യമിട്ടാണ് ഉത്തരകൊറിയ തീവണ്ടിയിൽ മിസൈൽ ഘടിപ്പിച്ചിരിക്കുന്നത്.
