കോന്നി:പുനലൂർ-മൂവാറ്റുപുഴ കെ.എസ്.റ്റി.പി റോഡ് പണിയിൽ വ്യാപക ക്രമക്കേടെന്ന് കോൺഗ്രസ്സ് കോന്നി മണ്ഡലം കമ്മിറ്റി ആരോപിച്ചു.വകയാർ-കോന്നി ബസ് സ്റ്റാന്റ് വരെ ചില ഭാഗങ്ങളിൽ കൃത്യമായ വീതി ഇല്ലാതെയാണ് റോഡ് പണി നടക്കുന്നത്.
റോഡ് പണിയുടെ മറവിൽ വ്യാപക മണ്ണ് കടത്ത്‌ നടക്കുന്നു.പോലീസ്,റവന്യു വകുപ്പ് അധികാരികൾ നടപടി സ്വീകരിക്കുന്നില്ല.റോഡ് പണി കാരണം കുടിവെള്ള വിതരണം തടസ്സപ്പെട്ടിട്ട് മാസങ്ങൾ ആയെങ്കിലും അത് പരിഹരിക്കുവാൻ ഉള്ള നടപടികൾ എങ്ങും എത്തിയില്ല.
പണി നടക്കുന്ന സ്ഥലത്തെ രൂക്ഷമായ ഗതാഗതക്കുരുക്ക് ഒഴിവാക്കുവാൻ ടിപ്പറുകളും മറ്റ് കൊച്ചു വാഹനങ്ങളും വഴി മാറ്റി വിടുവാൻ നിരവധി തവണ ആവശ്യപ്പെട്ടിട്ടും നടപടി എടുക്കാത്തത് കാരണം വിദ്യാഭ്യാസ സ്ഥാപനങ്ങൾ തുറന്നതോടു കൂടി ഗതാഗതക്കുരുക്ക് രൂക്ഷമാണ്.
റോഡ് സൈഡിലെ ഓടകൾ പണി കഴിഞ്ഞു ആഴ്ചകൾ ആയെങ്കിലും സ്ലാബ് ഇടാത്തത് കാരണം പല വീട്ടുകാർക്കും പുറത്തു ഇറങ്ങുവാൻ കഴിയാത്ത സാഹചര്യമാണ്.ആഴ്ചകൾക്കു മുൻപ് കോന്നി എം.എൽ.എ യുടെ നേതൃത്വത്തിൽ നടത്തിയ അവലോകന യോഗത്തിൽ ഈ വിവരങ്ങൾ ഉന്നയിച്ചതിനെ തുടർന്ന് 10 ദിവസത്തിനകം റിപ്പോർട്ട് നൽകുവാനും,പ്രശ്നങ്ങൾ പരിഹരിക്കുമെന്നു തീരുമാനം എടുത്തെങ്കിലും ഒന്നിനും ഒരു തീരുമാനമായില്ലെന്നും,ദുരിതം വർദ്ധിച്ചു വരികയാണെന്നും കോൺഗ്രസ്സ് ആരോപിക്കുന്നു.
റോഡ് പണിയുടെ മറവിൽ നടക്കുന്ന ക്രമക്കേടുകളെ കുറിച്ച് സമഗ്ര അന്വേഷണം നടത്തി ജനങ്ങളുടെ ബുദ്ധിമുട്ടുകൾ പരിഹരിക്കുവാൻ അടിയന്തര നടപടികൾ സ്വീകരിക്കണമെന്നും അവലോകന യോഗത്തിലെ തീരുമാനപ്രകാരം 10 ദിവസത്തിനകം നൽകേണ്ട റിപ്പോർട്ട് ആഴ്ചകൾ കഴിഞ്ഞെങ്കിലും,ഇനിയെങ്കിലും വെളിപ്പെടുത്തണമെന്നും അടിയന്തരമായി പ്രശ്നപരിഹാരം ഉണ്ടായില്ലയെങ്കിൽ ശ്കതമായ സമര പരിപാടികൾക്ക് കോൺഗ്രസ്സ് നേതൃത്വം നൽകുമെന്ന് മണ്ഡലം കമ്മിറ്റി പ്രസിഡന്റ് റോജി എബ്രഹാം അറിയിച്ചു.
