പത്തനംതിട്ട: സാമൂഹികപ്രവർത്തക ഡോ.എം.എസ്.സുനിൽ ഭവനരഹിതരായി കുടിലുകളിൽ കഴിയുന്ന നിരാശ്രയർക്കു പണിത് നൽകുന്ന 254 -മത് സ്നേഹ ഭവനം ഷിക്കാഗോ സെന്റ് തോമസ് സീറോ മലബാർ കത്തീഡ്രലിന്റെ സഹായത്താൽ മണ്ണടി നടുവിലേക്കര വലിയവീട്ടിൽ വൃന്ദക്കും മകൾ വിദ്യയ്ക്കുമായി നിർമ്മിച്ചു നൽകി.
ബിഷപ്പ് ജേക്കബ് അങ്ങാടിയത്തിന്റെ പൗരോഹിത്യ ഗോൾഡൻ ജൂബിലിയുടെ സ്മരണാർത്ഥം കത്തീഡ്രൽ നൽകുന്ന ആദ്യത്തെ വീടാണ് ഇത്. വീടിന്റെ താക്കോൽ ദാനവും ഉദ്ഘാടനവും കത്തീഡ്രൽ വികാരി ഫാ. തോമസ് കടുകപ്പിള്ളിൽ നിർവഹിച്ചു.
കത്തീഡ്രലിനു വേണ്ടി ഫിലിപ്പ് ജോസഫ് മാണിയത്ത് നൽകിയ തുക ഉപയോഗിച്ച് മൂന്ന് മുറികളും ഹാളും അടുക്കളയും ശുചിമുറി യും സിറ്റൗട്ടും അടങ്ങിയ ഒരു വീട് ടീച്ചർ ഇവർക്കായി പണിത് നൽകുകയായിരുന്നു .
വർഷങ്ങളായി സ്വന്തമായി വീടില്ലാതെ കോളജ് വിദ്യാർഥിനിയായ മകൾ വിദ്യയുമായി ശുചിമുറി പോലുമില്ലാത്ത സാഹചര്യത്തിൽ ഒറ്റപ്പെട്ട നിലയിൽ ആയിരുന്നു ഇവരുടെ താമസം. സിപിഎം ജില്ലാ സെക്രട്ടറി കെ പി ഉദയഭാനു ആണ് ഇവരുടെ അവസ്ഥ ടീച്ചറുടെ ശ്രദ്ധയിൽപ്പെടുത്തിയത്. ചടങ്ങിൽ വാർഡ് മെമ്പർ പ്രസന്നകുമാരി., മുൻ വികസനകാര്യ സ്റ്റാൻഡിങ് കമ്മിറ്റി ചെയർമാൻ സാജൻ., പ്രോജക്ട് കോഡിനേറ്റർ കെ. പി. ജയലാൽ, വൈഷ്ണവി ശൈലേഷ്., ശ്രീലേഷ് പിള്ള എന്നിവർ പ്രസംഗിച്ചു
