ഫോട്ടോ-എ. അര്‍ച്ചിത-കുട്ടികളുടെ പ്രസിഡന്റ്.
പാലക്കാട്: ജില്ലാ ശിശുക്ഷേമ സമിതി ശിശുദിനത്തോടനുബന്ധിച്ച് എല്‍.പി, യു.പി, ഹൈസ്‌കൂള്‍ വിഭാഗം വിദ്യാര്‍ത്ഥികള്‍ക്കായി പ്രസംഗം, ലളിതഗാനം, കവിതാലാപനം, ദേശഭക്തിഗാനം, കഥാരചന, ഉപന്യാസം മത്സരങ്ങള്‍ സംഘടിപ്പിച്ചു. പ്രസംഗ മത്സരത്തില്‍ എല്‍.പി വിഭാഗത്തില്‍ ഒന്നാം സ്ഥാനം നേടിയ പെരുമാങ്ങോട് എ.എല്‍.പി സ്‌കൂളിലെ കെ. ദേവിക കുട്ടികളുടെ പ്രധാനമന്ത്രിയായും യു.പി വിഭാഗത്തില്‍ ഒന്നാം സ്ഥാനം നേടിയ ശ്രീകൃഷ്ണപുരം എച്ച്.എച്ച്.എസിലെ എ. അര്‍ച്ചിത കുട്ടികളുടെ പ്രസിഡന്റായും എച്ച്.എസ് വിഭാഗത്തില്‍ ഒന്നാം സ്ഥാനം നേടിയ കരിപ്പോട് വി.ഇ.എം.എച്ച്.എസിലെ എസ്. അക്ഷയ കുട്ടികളുടെ സ്പീക്കറായും തിരഞ്ഞെടുക്കപ്പെട്ടു. നവംബര്‍ 14 ന് താരേക്കാട് എന്‍.ജി.ഒ യൂണിയന്‍ ഹാളില്‍ നടക്കുന്ന ശിശുദിന പരിപാടിയില്‍ മത്സര വിജയികള്‍ക്ക് സമ്മാനവിതരണം നടത്തും. ശിശുദിന റാലി രാവിലെ ഒമ്പതിന് മോയന്‍ എല്‍.പി സ്‌കൂളില്‍ ആരംഭിക്കും.
