നവരാത്രി മഹോത്സവത്തിന് ക്ഷേത്രങ്ങള്‍ ഒരുങ്ങി
നവരാത്രി മഹോത്സവത്തിന് ക്ഷേത്രങ്ങള്‍ ഒരുങ്ങി .ഇനി 9 ദിനം ദേവിയുടെ വിവിധ ഭാവങ്ങളെ ആരാധിക്കും .ദക്ഷിണേന്ത്യയില്‍ മഹിഷാസുര വധവുമായി ബന്ധപ്പെട്ടാണ് നവരാത്രി ആഘോഷം. എന്നാല്‍ ഉത്തരേന്ത്യയില്‍ ശ്രീരാമന്‍ രാവണനെ വധിച്ചതിന്‍റെ സന്തോഷ സൂചകമാണ് നവരാത്രി.
കന്നിമാസത്തിലെ കറുത്തവാവിന് ശേഷമുള്ള വെളുത്ത പക്ഷത്തില്‍ പ്രഥമ മുതല്‍ നവമി വരെയുള്ള ഒന്‍പത് ദിവസങ്ങളിലായാ‍ണ് നവരാത്രി ആഘോഷം.സ്ത്രൈണ ശക്തിയുടെ പ്രതീകം, തിന്മയ്ക്കുമേല്‍ നന്മനേടിയ വിജയം, വിദ്യാരംഭം, സംഗീതം ,നൃത്തം തുടങ്ങിയ കലകളുടെ പഠനം ആരംഭിക്കല്‍, ഗ്രന്ഥപൂജ, ആയുധപൂജ എന്നിങ്ങനെ നവരാത്രി മഹോത്സവത്തിന് പ്രത്യേകതകള്‍ ഏറെയാണ്.
ആദ്യത്തെ മൂന്ന് ദിവസം ശക്തിരൂപിണിയായ ദുര്‍ഗ്ഗാദേവിയും അടുത്ത മൂന്ന് ദിവസം ഐശ്വര്യ ദേവതയായ മഹാലക്ഷ്മിയും അവസാനത്തെ മൂന്ന് ദിവസം സരസ്വതി ദേവിയുമാണ് ആരാധനാ മൂര്‍ത്തികള്‍. അവസാനത്തെ മൂന്ന് ദിവസത്തെ ആരാധനയ്ക്കും വ്രതാനുഷ്ഠാനങ്ങള്‍ക്കും കേരളീയര്‍ കൂടുതല്‍ പ്രാധാന്യം നല്‍കുന്നു.മാതൃദേവിയായ ജഗദീശ്വരിയെ ഒന്‍പത് ഭാവങ്ങളിലാണ് നവരാത്രി ദിനങ്ങളില്‍ ആരാധിക്കുന്നത്. ഈ ദേവീ രൂപങ്ങള്‍ നവദുര്‍ഗ്ഗമാര്‍ എന്ന് അറിയപ്പെടുന്നു.ലകളുടെയും വിദ്യാരംഭത്തിന്റെയും ആരാധനയുടെയും വിജയത്തിന്റെയും ഉത്സവമാണ് നവരാത്രി അഥവാ മഹാനവരാത്രി.
കോന്നി മഠത്തില്‍ക്കാവ് ഭഗവതി ക്ഷേത്രത്തിലെ നവരാതി മഹോത്സവത്തിന് തുടക്കം കുറിച്ച് കൊണ്ട് ഭദ്ര ദീപം തെളിഞ്ഞു . ഈ മാസം പതിമൂന്നു വരെയാണ് മഹോത്സവം . എന്‍ എസ് എസ് ഡയറക്ടര്‍ ബോര്‍ഡ്‌ അംഗം അഡ്വ ആര്‍ ഹരിദാസ്‌ ഇടത്തിട്ട ഭദ്രദീപം തെളിയിച്ചു . ആചാര്യ വരണം , ഭദ്ര ദീപ പ്രതിഷ്ഠ , മാഹാത്മ്യ പ്രഭാക്ഷണം , എന്നിവ നടന്നു . എന്‍ എസ് എസ് താലൂക്ക് യൂണിയന്‍ സെക്രട്ടറി വി ഷാബു , യൂണിയന്‍ കമ്മറ്റി അംഗം കെ സരോജ് കുമാര്‍ എന്നിവര്‍ സംസാരിച്ചു .
