തദ്ദേശ തിരഞ്ഞെടുപ്പ്: ഇവിഎം കമ്മീഷനിങ് കേന്ദ്രങ്ങള് ജില്ല കലക്ടര് സന്ദര്ശിച്ചു
തദ്ദേശ സ്വയം ഭരണസ്ഥാപനങ്ങളിലെ പൊതു തിരഞ്ഞെടുപ്പുമായി ബന്ധപ്പെട്ട് ജില്ലയിലെ വോട്ടിംഗ് യന്ത്രങ്ങളുടെ കമ്മീഷനിങ് കേന്ദ്രങ്ങള് ജില്ല തിരഞ്ഞെടുപ്പ് വരണാധികാരിയായ ജില്ലാ കലക്ടര് എസ് പ്രേം കൃഷ്ണന് സന്ദര്ശിച്ചു. നഗരസഭ, ബ്ലോക്ക് പഞ്ചായത്ത് എന്നിവിടങ്ങളിലെ കമ്മീഷനിങ് കേന്ദ്രത്തോടൊപ്പം സജ്ജീകരിച്ച സ്ട്രോങ് റൂമും ജില്ല കലക്ടര് പരിശോധിച്ചു. പന്തളം, പത്തനംതിട്ട നഗരസഭകളിലെയും മല്ലപ്പള്ളി, കോയിപ്രം, റാന്നി, കോന്നി, പന്തളം, പറക്കോട് ബ്ലോക്ക് പഞ്ചായത്തിലെയും വോട്ടിംഗ് യന്ത്രങ്ങളുടെ കമ്മീഷനിങ്ങാണ് നടന്നത്.
സ്ഥാനാര്ഥിയുടെ പേര്, ചിഹ്നം എന്നിവ പ്രിന്റ് ചെയ്ത ബാലറ്റ് ലേബല് വോട്ടിംഗ് മെഷീനില് ചേര്ത്ത് പ്രവര്ത്തന സജ്ജമാണെന്ന് ഉറപ്പുവരുത്തി. നഗരസഭ, ത്രിതല പഞ്ചായത്ത് എന്നിടങ്ങളിലേക്കുള്ള വോട്ടിംഗ് യന്ത്രങ്ങളാണ് അതാത് കേന്ദ്രങ്ങളില് സജ്ജമാക്കുന്നത്.
വോട്ടര്മാര്ക്ക് എളുപ്പത്തില് തിരിച്ചറിയുന്നതിനായി മെഷീനില് വ്യത്യസ്ത നിറത്തിലുള്ള ബാലറ്റ് ലേബലാണ് പതിക്കുന്നത്. നഗരസഭയ്ക്കും ഗ്രാമപഞ്ചായത്തിനും വെള്ളയും ബ്ലോക്ക് പഞ്ചായത്തിന് പിങ്കും ജില്ലാ പഞ്ചായത്തിന് ഇളം നീല നിറത്തിലുള്ള ലേബലാണ് ഉപയോഗിക്കുന്നത്. സ്ഥാനാര്ഥികളുടെ എണ്ണത്തിന് അനുസരിച്ചാണ് ബാലറ്റ് യൂണിറ്റ് ക്രമീകരിക്കുന്നത്. സ്ഥാനാര്ഥികളുടെയും പ്രതിനിധികളുടെയും സാന്നിധ്യത്തിലാണ് വോട്ടിങ് മെഷീന് കമ്മീഷനിങ് നടത്തിയത്. വോട്ടെടുപ്പിന്റെ തലേന്ന് പോളിംഗ് ഉദ്യോഗസ്ഥര്ക്ക് വോട്ടിംഗ് യന്ത്രം കൈമാറും.
പന്തളം നഗരസഭയുടെയും ബ്ലോക്കിന്റെയും കമ്മീഷനിംഗ് പന്തളം എന്എസ്എസ് കോളജിലും പത്തനംതിട്ട നഗരസഭയുടെ കാതോലിക്കേറ്റ് കോളജിലും നടന്നു.
റാന്നി ബ്ലോക്കിന്റെ റാന്നി സെന്റ് തോമസ് കോളജിലും കോയിപ്രത്തെ ഇരവിപേരൂര് സെന്റ് ജോണ്സ് ഹയര് സെക്കന്ഡറി സ്കൂളിലും പറക്കോടിന്റെ അടൂര് ബിഎഡ് സെന്ററിലും കോന്നിയുടെ എലിയറയ്ക്കല് അമൃത വൊക്കേഷണല് ഹയര് സെക്കന്ഡറി സ്കൂളിലുമാണ് കമ്മീഷനിങ് നടന്നത്. ഡിസംബര് അഞ്ചിന് പുളിക്കീഴ്, മല്ലപ്പള്ളി ബ്ലോക്ക്, തിരുവല്ല നഗരസഭ എന്നിവയുടെ കമ്മീഷനിങ് നടക്കും.
ഇലക്ഷന് ഡെപ്യൂട്ടി കലക്ടര് ബീന എസ് ഹനീഫ്, വകുപ്പ് ഉദ്യോഗസ്ഥര് തുടങ്ങിയവര് പങ്കെടുത്തു.
ഭിന്നശേഷി കുട്ടികളുടെ ലോകം വിശാലമാക്കണം : ജില്ലാ കലക്ടര്; ‘കലക്ടര്ക്കൊപ്പം കൈകോര്ക്കാം’ സംഘടിപ്പിച്ചു
ഭിന്നശേഷി കുട്ടികളെ വീട്ടില് മാത്രമായി ഒതുക്കാതെ പഠനത്തിലും കലാപരിപാടികളിലും സജീവമായി പങ്കെടുപ്പിച്ച് അവരുടെ ലോകം വിശാലമാക്കണമെന്ന് ജില്ല കലക്ടര് എസ് പ്രേം കൃഷ്ണന്. അന്താരാഷ്ട്ര ഭിന്നശേഷി ദിനാചരണത്തിന്റെ ഭാഗമായി ജില്ലാ ഭരണകൂടവും വൈസ് മെന് ക്ലബ് പത്തനംതിട്ടയും സംയുക്തമായി കലക്ടറേറ്റ് കോണ്ഫറന്സ് ഹാളില് സംഘടിപ്പിച്ച ‘കലക്ടര്ക്കൊപ്പം കൈകോര്ക്കാം’ പരിപാടിയുടെ ഉദ്ഘാടനം നിര്വഹിക്കുകയായിരുന്നു അദ്ദേഹം.
സമൂഹത്തില് ഇടം ലഭിക്കുമ്പോഴാണ് ഭിന്നശേഷി കുട്ടികളുടെ കഴിവ് പൂര്ണമായി തെളിയുന്നത്. ഇവരുടെ പഠനത്തിനായി ജില്ലയില് വിവിധ സ്കൂളുകള് ഉണ്ട്. ഓരോ വ്യക്തിയുടെയും കഴിവ് വ്യത്യസ്തമാണ്.
പ്രതിഭയും കഴിവും തിരിച്ചറിയപ്പെട്ട് ഭിന്നശേഷി കുട്ടികള് വളരുവാന് സമൂഹത്തിന്റെ പിന്തുണ ആവശ്യമാണെന്നും ജില്ല കലക്ടര് പറഞ്ഞു. ജില്ലാ ദുരന്തനിവാരണ ഡെപ്യൂട്ടി കലക്ടര് ആര് രാജലക്ഷ്മി അധ്യക്ഷയായി. സിനിമ സംവിധായകന് രാകേഷ് കൃഷ്ണന് കുരമ്പാല മുഖ്യാതിഥിയായി.
മലയാലപ്പുഴ ബഡ്സ് സ്കൂള്, പത്തനംതിട്ട മുനിസിപ്പാലിറ്റി ബഡ്സ് സ്കൂള് എന്നിവിടങ്ങളിലെ കുട്ടികള്ക്ക് ജില്ല കലക്ടര് സ്നേഹോപഹാരം നല്കി. കുട്ടികള് കലാപരിപാടി അവതരിപ്പിച്ചു. ഡെപ്യൂട്ടി കലക്ടര് ബീന എസ് ഹനീഫ്, ഹുസൂര് ശിരസ്തദാര് വര്ഗീസ് മാത്യു, വൈസ് മെന് ക്ലബ് ഭാരവാഹി ജേക്കബ് വര്ഗീസ് എന്നിവര് പങ്കെടുത്തു.
ആറാം ക്ലാസ് പ്രവേശന പരീക്ഷ ഡിസംബര് 13ന്
ജവഹര് നവോദയ വിദ്യാലയത്തില് ആറാം ക്ലാസിലേക്കുളള പ്രവേശന പരീക്ഷ ഡിസംബര് 13 ന് നടക്കും. navodaya.gov.in/ വെബ്സൈറ്റില് നിന്നും ഡൗണ്ലോഡ് ചെയ്ത അഡ്മിറ്റ് കാര്ഡുമായി അതാത് പരീക്ഷാ കേന്ദ്രങ്ങളില് രാവിലെ 10 ന് മുമ്പ് എത്തണം. ഫോണ് : 04735 294263, 9591196535.
ഹോസ്പിറ്റല് അഡ്മിനിസ്ട്രേഷന്
കേരള സ്റ്റേറ്റ് റൂട്രോണിക്സ് സര്ട്ടിഫിക്കറ്റോടെ തിരുവനന്തപുരം, ആറ്റിങ്ങല് അംഗീകൃത പഠനകേന്ദ്രങ്ങളിലേക്ക് ഒരുവര്ഷം ദൈര്ഘ്യമുള്ള പ്രൊഫഷണല് ഡിപ്ലോമ ഇന് ഹോസ്പിറ്റല് അഡ്മിനിസ്ട്രേഷന് കോഴ്സിലേക്ക് ഇന്റ്റേണ്ഷിപ്പോടുകൂടി റഗുലര്, പാര്ട്ട് ടൈം ബാച്ചുകളിലേക്ക് പ്ലസ് ടു കഴിഞ്ഞവരില് നിന്ന് അപേക്ഷ ക്ഷണിച്ചു. ഫോണ് : 7994926081.
റാങ്ക് പട്ടിക റദ്ദായി
ജില്ലയിലെ വിദ്യാഭ്യാസ വകുപ്പിലെ യുപി സ്കൂള് ടീച്ചര് (മലയാളം മാധ്യമം) (കാറ്റഗറി നം. 517/19) തസ്തികയിലേക്ക് 2022 ഒക്ടോബര് 10 ന് നിലവില് വന്ന റാങ്ക് പട്ടിക റദ്ദായതായി ജില്ലാ പിഎസ്സി ഓഫീസര് അറിയിച്ചു. ഫോണ് : 0468 2222665.
സ്കോള് കേരള
ഡിപ്ലോമ ഇന് ചൈല്ഡ് കെയര് ആന്ഡ് പ്രീ സ്കൂള് മാനേജ്മെന്റ് കോഴ്സ് ആദ്യ ബാച്ച് പരീക്ഷ 2026 ജനുവരി മൂന്നിന് ആരംഭിക്കും. തിയറി പരീക്ഷ ജനുവരി മൂന്ന്, നാല്, 10 തീയതികളിലും പ്രായോഗിക പരീക്ഷ ജനുവരി 17,18,25 തീയതികളിലും അതാത് പരീക്ഷാ കേന്ദ്രങ്ങളില് നടക്കും. വെബ് സൈറ്റ് : www.scolekerala.org
ഫോണ് : 0471 2342950, 2342271, 2342369.
ഭിന്നശേഷി ദിനാഘോഷം
സമഗ്ര ശിക്ഷാ കേരളം പത്തനംതിട്ട ജില്ലയുടെ ആഭിമുഖ്യത്തില് ലോക ഭിന്ന ശേഷി ദിനാഘോഷം തിരുവല്ല ബോധനയില് സംഘടിപ്പിച്ചു. പത്തനാപുരം ഗാന്ധിഭവന് ഡയറക്ടര് പുനലൂര് സോമരാജന് സമ്മേളനം ഉദ്ഘാടനം ചെയ്തു. തിരുവല്ല ഡി ഇ ഒ പി ആര് മല്ലിക അധ്യക്ഷയായി. സമഗ്ര ശിക്ഷാ കേരളം ജില്ലാ പ്രോജക്ട് കോര്ഡിനേറ്റര് റെനി ആന്റണി , ഫാ.ബിനീഷ് സൈമണ് കാഞ്ഞിരത്തിങ്കല്, റോയ് റ്റി മാത്യു, ആരതി കൃഷ്ണ, വി കെ മിനി കുമാരി, എ വി ജോര്ജ്, ഷാജി മാത്യു എന്നിവര് പങ്കെടുത്തു.
